“Rəqəmsal səhiyyənin tətbiqinin genişləndirilməsi” işçi altqrupunun ilk iclası keçirilib
Azərbaycan Respublikası Prezidentinin səhiyyə və tibbi sığorta sahəsində idarəetmənin təkmilləşdirilməsi ilə bağlı 13 may 2022-ci il tarixli Fərmanının 1-ci bəndinin icrası məqsədilə Səhiyyə Nazirliyində “Səhiyyənin Transformasiyası Mərkəzi” işçi qrupu nəzdində yaradılmış “Rəqəmsal səhiyyənin tətbiqinin genişləndirilməsi” işçi altqrupunun ilk iclası keçirilib.
Nazirliyin mətbuat xidmətindən bildirilir ki, tədbirdə Səhiyyə, Rəqəmsal İnkişaf və Nəqliyyat, Əmək və Əhalinin Sosial Müdafiəsi nazirliklərinin, həmçinin İcbari Tibbi Sığorta üzrə Dövlət Agentliyinin sahə üzrə məsul şəxsləri iştirak ediblər.
İclası giriş sözü ilə açan “Səhiyyənin Transformasiyası Mərkəzi” işçi qrupu və “Rəqəmsal səhiyyənin tətbiqinin genişləndirilməsi” işçi altqrupunun rəhbəri, səhiyyə naziri Teymur Musayev diqqətə çatdırıb ki, adı çəkilən Fərmanda səhiyyə və tibbi sığorta sahəsində normativ hüquqi bazanın təkmilləşdirilməsi, şəffaflığın və hesabatlılığın artırılması, rəqəmsal səhiyyənin inkişaf etdirilməsi prioritet istiqamətlər kimi müəyyənləşdirilib. Teymur Musayev elektron səhiyyənin inkişaf etdirilməsinə dair təkliflərin üç ay müddətində hazırlanıb Prezident İlham Əliyevə təqdim edilməli olduğunu vurğulayıb. Qeyd edib ki, bu məqsədlə dövlət orqanlarının nümayəndələrini, habelə mütəxəssisləri və ekspertləri cəlb etməklə “Səhiyyənin Transformasiyası Mərkəzi” işçi qrupu və onun səhiyyə sahəsində əsas fəaliyyət istiqamətləri üzrə işçi altqrupları yaradılıb.
Səhiyyə sisteminin təkmilləşdirilməsinin ölkəmiz üçün prioritet məsələ olduğunu da qeyd edən işçi qrupunun rəhbəri deyib: “Son zamanlar dövlət qurumlarında informasiya-kommunikasiya texnologiyaları sürətlə tətbiq olunur. Qabaqcıl ölkələrin təcrübələri göstərir ki, səhiyyənin gələcəyi yalnız rəqəmsallaşdırma üzərindən həyata keçiriləcək. Bunu nəzərə alaraq, rəqəmsallaşdırma sahəsində lider olan ölkələrin modellərinin tətbiqi bizim üçün xüsusi əhəmiyyət kəsb edir. Məqsədimiz gələcəkdə Azərbaycan səhiyyəsinin qlobal geoinformasiya sisteminə inteqrasıyasına nail olmaqdır”.
Teymur Musayev həmçinin qeyd edib ki, hazırda elektron səhiyyə terminlərinin Azərbaycan dilində lüğətinin tərtib edilməsi istiqamətində müvafiq işlər görülür.
Daha sonra işçi altqrupun üzvlərinin mövzu ilə bağlı fikirləri dinlənilib.
Müzakirələrdən sonra içşi qrupun rəhbəri Teymur Musayev növbəti iclasda tərəflərin səhiyyənin rəqəmsallaşdırmasına dair öz təkliflərini təqdim etmələrini tapşırıb.
