Azərbaycan Tibb Universitetinin (ATU) Tədris Stomatoloji Klinikasında şəhid və qazi ailələrinin üzvləri üçün aksiyaya start verilib.
Universitetdən xəbər verildiyinə görə, ATU-nun Tədris Stomatoloji Klinikasının direktoru Mahir Səfərov aksiya çərçivəsində şəhid və qazi ailələrinin üzvlərinin ödənişsiz stomatoloji müayinələrinin və müalicəsinin aparıldığını deyib: “Klinikanın tədris bazasında həkimlərimiz tərəfindən şəhid və qazi ailələrinin üzvlərinə lazımi tibbi xidmətlər göstərilir. Aksiya çərçivəsində pulsuz müayinələrlə yanaşı, xəstələrə hər növ stomatoloji yardım göstərilir – dişlərin kompüter tomoqrafiyasının aparılması, plomb qoyulması, müalicəsi, dişin çıxarılması kimi stomatoloji prosedurlar aparılır. Qeyd edim ki, ATU-nun Stomatoloji Klinikasının kollektivi müharibə qəhrəmanlarının və onların ailə üzvlərinin tibbi problemlərinə daim diqqət və qayğı ilə yanaşır”.
Şəhid və qazi ailə üzvləri üçün stomatoloji aksiya oktyabrın 27-də başlayıb və iki həftə davam edəcək. Həmin aksiya Vətən müharibəsi qəhrəmanlarına sosial qayğının gücləndirilməsi işinə ATU-nun bir töhfəsidir.

---

---