Azərbaycanla Pakistan arasında səhiyyə əməkdaşlığının perspektivləri müzakirə edilib

Azərbaycanla Pakistan arasında səhiyyə əməkdaşlığının perspektivləri müzakirə edilib

Səhiyyə Nazirliyində Pakistan İslam Respublikasının ölkəmizdəki fövqəladə və səlahiyyətli səfiri Bilal Haye ilə görüş keçirilib.
Nazirliyin mətbuat xidmətindən bildirildiyinə görə, tədbirdə səhiyyə və tibb elmi sahəsində əməkdaşlığın inkişaf etdirilməsi və gücləndirilməsinin perspektivləri müzakirə olunub.
Qonaqları salamlayan səhiyyə naziri Teymur Musayev Azərbaycanla Pakistan arasında əlaqələrin dərin köklərə malik olduğunu qeyd edib. Nazir iki qardaş ölkə arasında bütün sahələrdə əməkdaşlığın nümunəvi olduğunu vurğulayıb: “Səhiyyə siyasəti və ictimai səhiyyə sahəsində Pakistan ilə əməkdaşlığımız beynəlxalq müstəvidə - Ümumdünya Səhiyyə Təşkilatı (ÜST), İqtisadi Əməkdaşlıq Təşkilatı, İslam Əməkdaşlıq Təşkilatı, Qoşulmama Hərəkatı səhiyyə nazirlərinin əməkdaşlığı çərçivəsində aparılır”.
Nazir qeyd edib ki, ölkələrimiz arasında səhiyyə sahəsinə və tibb elminə dair memorandum imzalanmasa da, sıx əməkdaşlıq mövcuddur: “Səhiyyə və tibb elmi sahəsində əməkdaşlıq əlaqələrimiz Azərbaycan Respublikası hökuməti ilə Pakistan İslam Respublikası hökuməti arasında Birgə Komissiyanın Protokolunun müddəalarına uyğun olaraq həyata keçirilir. Sonuncu Komissiyanın Protokoluna əsasən, Azərbaycan tərəfindən səhiyyə sahəsində əməkdaşlıq üzrə işçi qrup müəyyən edilib və bu barədə Pakistan tərəfinə məlumat verilib. Eləcə də bu ilin iyun ayında Pakistanın yeni təyin edilmiş səhiyyə nazirinə diplomatik kanallarla təbrik məktubu göndərilib”.
Çıxışının sonunda Teymur Musayev gələcəkdə əməkdaşlığın daha da uğurla inkişaf etdiriləcəyinə ümidvar olduğunu deyib.
Öz növbəsində Bilal Haye Azərbaycanın Pakistan xalqının qəlbində xüsusi yeri olan ölkə olduğunu bildirib.
Səfir qeyd edib ki, hazırda 25 pakistanlı tələbə Azərbaycan Tibb Universitetində ali tibb təhsili alır.
Qarşılıqlı anlaşma şəraitində keçən görüşdə əməkdaşlığın mövcud vəziyyəti və potensial inkişaf imkanları, nazirliklər arasında tibb elmi sahəsində və qlobal pandemiyaya qarşı mübarizə üzrə ÜST, İslam Əməkdaşlıq Təşkilatı, Qoşulmama Hərəkatı və digər beynəlxalq təşkilatlar çərçivəsində və birbaşa əlaqələrin önəmi qeyd edilib.





Oktyabr 2022

~ Sonuncu nömrə ~

Bütün nömrələr

Elanlar
ELANLAR

Daha çox

Film və videolar

Daha çox

Sosial reklamlar

Daha çox

Facebook
Səhiyyə Nazirliyinin nəşrləri

İlham Əliyev

Mehriban Əliyeva

Mehriban Əliyeva


Nigar Məcidova