Səhiyyə Nazirliyi Ə.Əliyev adına Azərbaycan Dövlət Həkimləri Təkmilləşdirmə İnstitutu və Tibbi Ərazi Bölmələrini İdarəetmə Birliyinin tabeliyindəki M.Mirqasımov adına Respublika Klinik Xəstəxanası arasında qarşılıqlı əməkdaşlıq haqqında memorandum imzalanıb.
Sənəd həkim-mütəxəssis hazırlığının səmərəliliyinin artırılmasını, təhsilin keyfiyyət səviyyəsinin beynəlxalq tibb təhsil sisteminin prinsiplərinə uyğunlaşdırılmasını, rezidentura və doktorantura səviyyələrində yüksəkixtisaslı tibbi-elmi və elmi-pedaqoji kadrların Respublika Klinik Xəstəxanasında təcrübə keçmələrini, bunun sayəsində müalicə, konsultasiya yardımının təkmilləşdirilməsini ehtiva edir.
Qarşılıqlı əməkdaşlıq səhiyyənin inkişaf etdirilməsi, xəstəxanada tibbi xidmətin keyfiyyətinin artırılması baxımından önəmli olacaq. Həmçinin rezident və doktorantların təcrübə keçməsi onların bilik, bacarıq və peşəkar vərdişlərinin inkişaf etdirilməsi üçün əhəmiyyətlidir. Tərəflər tibb işçilərinin təkmilləşdirilməsi məqsədilə qarşılıqlı təcrübə mübadiləsinin həyata keçirilməsinin, birgə elmi tədqiqatların aparılmasının vacibliyini vurğulayıblar.

---

---