Avropa Komissiyası koronavirusa yoluxmanın qarşısını alan “Evuşeld” preparatını təsdiqləyib
Avropa Komissiyası koronavirusa yoluxmanın qarşısını almaq üçün “AstraZeneca” Böyük Britaniya-İsveç istehsalı olan “Evuşeld” preparatının bu qitədə istifadəsini təsdiqləyib. Bu barədə Avropa Dərman Agentliyi (ADA) məlumat yayıb.
Bundan əvvəl, ADA-nın İnsan üçün Dərmanlar Komitəsi “Evuşeld”in böyüklərdə və ən azı 40 kiloqram çəkisi olan 12 yaşdan yuxarı yeniyetmələrdə istifadəsi üçün qeydiyyat şəhadətnaməsinin verilməsini tövsiyə etmişdi. İndi isə Avropa İttifaqının tənzimləyicisi Avropa Komissiyasının preparatın istifadəsinə artıq icazə verdiyini bildirib.
“Evuşeld” iki monoklonal anticismin – tiksagevimab və silgavimabın qarışığından hazırlanıb. ADA-ya görə iki inyeksiya yolu ilə tətbiq edilən preparat altı aya qədər koronavirus infeksiyasına yoluxmanın qarşısını almaqda effektivdir və adətən yüngül formada özünü büruzə verən az sayda yan təsirlərə malikdir.
Xatırladaq ki, ötən ilin dekabr ayında ABŞ-ın Qida məhsullarının və dərmanların keyfiyyətinə sanitar nəzarət agentliyi (FDA) də immun sistemi zəif olan, müəyyən xəstəlik, yaxud immunsupressiv dərman preparatlarının qəbulu səbəbindən vaksinasiya yolu ilə COVID-19-a immun cavab verməyən insanlarda, eləcə də vaksinin ciddi yan təsirlər yaratdığı şəxslərdə “Evuşeld”in istifadəsinə icazə vermişdi. FDA-nın tövsiyəsinə görə, “Evuşeld”i koronavirusa yoluxmamış və yaxın vaxtlarda COVID xəstəsi ilə təmasda olmamış insanlarda istifadə etmək olar.
