Sanator-Kurort Reabilitasiya Mərkəzi Qarabağ qazilərinin xidmətində
Ötən ilin noyabr ayından bu günə qədər Səhiyyə Nazirliyinin Sanator-Kurort Reabilitasiya Mərkəzində 1300-dən çox Qarabağ müharibəsi qazisi müalicə olunub. Qazilərin əksəriyyəti bir dəfə müraciət edənlər olsa da, müalicənin effektivliyindən asılı olaraq, onların arasında iki və ya üç dəfə müraciət edənlər də var. Müraciətlər əsasən kəllə-beyin, onurğa-beyin travmaları, dayaq-hərəkət və periferik sinir sistemlərinin zədələnmələri ilə əlaqədardır.
Bunu Sanator-Kurort Reabilitasiya Mərkəzinin direktoru Mürsəl Mürsəlov Səhiyyə Nazirliyinin instaqram səhifəsinin canlı yayımında qazilərin reabilitasiyası mövzusunda danışarkən deyib.
M.Mürsəlov bildirib ki, hər ay ərzində təxminən 150 qazinin mərkəzə müraciəti qeydə alınır: “Onlar əsasən güllə, qəlpə və müxtəlif çaplı mərmi yaralarından əziyyət çəkən qazilərdir. Kəllə-beyin travmaları ilə bağlı müraciətlər daha çoxdur. Mərkəzə müraciət edənlərin təxminən 100-150 nəfərində açıq kəllə-beyin travması, 700 nəfərdən çox qazidə isə qapalı kəllə-beyin travması baş verib. Təxminən 400 nəfər qazinin onurğa-beyin zədələnməsi müalicə olunub. Bundan başqa, 10-15 nəfər qazi mərkəzə nitq qüsurları ilə bağlı müraciət edib, onlar loqoped müalicəsi aldıqdan sonra tam sağalıb və evə buraxılıblar. Ümumiyyətlə, qazilərdə kombinə olunmuş zədələnmələr daha çoxdur. Mərkəzdə qazilərə fizioterapiya, müxtəlif müalicəvi vanna və masajlar, müalicəvi bədən tərbiyəsi və s. tibbi xidmətlər təklif edilir. Maksimum effekt əldə etmək üçün lazım olan müalicə üsulları kompleks şəkildə həyata keçirilir”.
Hazırda mərkəzin yalnız qazilərə xidmət göstərdiyini bildirən M.Mürsəlov qeyd edib ki, növbəti aylarda Sanator-Kurort Reabilitasiya Mərkəzində şəhid ailələrinin reabilitasiya, müalicə və istirahətinin təşkil edilməsi də planlaşdırılır: “Səhiyyə nazirinin birinci müavini, səhiyyə nazirinin vəzifələrini müvəqqəti icra edən Teymur Musayevin tapşırığı ilə iyul ayında mərkəzdə xüsusi bir aksiya təşkil edildi. Vətən müharibəsi şəhidlərinin həyat yoldaşlarına və övladlarına sanatoriya, reabilitasiya və bərpa xidməti göstərmək həmin aksiyanın başlıca məqsədi idi. Aksiya çərçivəsində müraciət edən 105 şəhid övladı və 55 şəhid xanımı mərkəzin xidmətlərindən yararlana bildilər. Aksiyanın növbəti aylarda icrası üçün təkliflər hazırlanaraq Səhiyyə Nazirliyinə göndərilib. Hesab edirəm ki, təklif tez bir zamanda qəbul ediləcək”.
