Azərbaycan Respublikasının Prezidenti İlham Əliyev “Bədən Tərbiyəsi və İdman üzrə Nazirlərin və Yüksək Vəzifəli Şəxslərin VII Beynəlxalq Konfransının (MİNEPS VII) 2023-cü ildə Bakı şəhərində keçirilməsi ilə əlaqədar Təşkilat Komitəsinin yaradılması haqqında” Sərəncam imzalayıb.
Sənəddə bildirilir ki, idman sahəsində hökumətlərarası təşkilatları, idman hərəkatlarını, ixtisaslaşmış qeyri-hökumət təşkilatlarını və idman mütəxəssislərini bir araya toplayan UNESCO-nun Bədən Tərbiyəsi və İdman üzrə Nazirlərin və Yüksək Vəzifəli Şəxslərin Beynəlxalq Konfransı (MİNEPS) dünyada bədən tərbiyəsi və idman sahəsinə töhfə verən ən nüfuzlu tədbirlərdən biri hesab olunur.
2022-ci il oktyabrın 28-də Paris şəhərində UNESCO-nun Bədən Tərbiyəsi və İdman üzrə Hökumətlərarası Komitəsinin (CİGEPS) növbəti sessiyasında Azərbaycan Respublikası Hökuməti ilə UNESCO arasında Ev sahibliyi haqqında Saziş imzalanmış və Azərbaycan 2023-cü ildə keçiriləcək MİNEPS VII Beynəlxalq Konfransına, eləcə də əlaqədar yığıncaqların təşkilinə ev sahibliyi etmək hüququ əldə etmişdir.
Bununla əlaqədar olaraq, həmin Sərəncamla müvafiq Təşkilat Komitəsi yaradılıb, onun sədri və üzvləri müəyyən edilib. Belə ki, Konfransın keçirilməsi üzrə Təşkilat Komitəsinin sədri Azərbaycan Respublikasının gənclər və idman naziri olacaq.
Təşkilat Komitəsi əlaqədar nazirliklərin nazir müavinlərindən və bir sıra qurumların rəhbər şəxslərindən təşkil olunub. Onun üzvləri arasında Azərbaycan Respublikası səhiyyə nazirinin müavini də var.
Təşkilat Komitəsinə MİNEPS VII Konfransının Bakıda keçirilməsinə dair Tədbirlər Planı hazırlayıb həyata keçirmək, Nazirlər Kabinetinə Sərəncamdan irəli gələn məsələləri həll etmək tapşırılıb.

---

---