Səhiyyə Nazirliyində ölkəmizdə işgüzar səfərdə olan Ümumdünya Səhiyyə Təşkilatının (ÜST) Malyariyaya yerli yoluxmanın kəsilməsinin Sertifikatlaşdırılması üzrə Texniki Məsləhət Qrupunun üzvlərinin daxil olduğu müstəqil Qiymətləndirmə Missiyasının nümayəndə heyəti ilə görüş keçirilib. Görüşdə ÜST-nin Azərbaycan üzrə nümayəndəliyinin rəhbəri Hande Harmancı da iştirak edib.
Səhiyyə Nazirliyinin mətbuat xidmətindən verilən məlumata görə, qonaqları salamlayan səhiyyə naziri Teymur Musayev ölkəmizin ÜST ilə əməkdaşlığa böyük önəm verdiyini vurğulayıb. O bildirib ki, Azərbaycan bu nüfuzlu səhiyyə təşkilatı ilə 1992-ci ildən sıx əməkdaşlıq edir və bu əməkdaşlıq hər il yüksələn xətlə inkişaf etməkdədir.
Nazir ölkəmizdə malyariya xəstəliyinin qarşısının alınması və ocaqlarının aradan qaldırılması istiqamətində aparılan işləri diqqətə çatdırıb: “Uzun illərdir ki, Azərbaycanda malyariyanın qarşısının alınması və ocaqlarının aradan qaldırılması istiqamətində genişmiqyaslı tədbirlər həyata keçirilir. Bu səylər nəticəsində Azərbaycanda 2013-cü ildən malyariyaya yerli yoluxma halları qeydə alınmayıb”.
Teymur Musayev ölkədə ötən əsrin 90-cı illərinin əvvəllərində məlum səbəblərdən sosial-siyasi vəziyyətin pisləşməsi, 1 milyondan çox qaçqın və məcburi köçkünün, əhali arasında xaotik miqrasiyanın olması nəticəsində malyariya xəstəliyinin geniş miqyasda yayıldığını və ölkə ərazisinin 80 faizini əhatə etdiyini xatırladıb: “Epidemioloji vəziyyətlə əlaqədar ÜST-nin tövsiyələrinə müvafiq olaraq Milli Proqram hazırlanıb və həmin proqramın uğurla həyata keçirilməsi nəticəsində epidemiyanın genişlənməsinin qarşısı alındığı üçün xəstələnmə səviyyəsi ilbəil azalmağa başlayıb”.
Nazir vurğulayıb ki, Azərbaycanda malyariya xəstəliyinin aradan qaldırılmasına milli səhiyyə sisteminin gücləndirilməsi, Səhiyyə Nazirliyinin bütün strukturlarının ölkənin digər nazirlikləri, idarə və təşkilatları ilə birgə koordinasiyalı fəaliyyəti nəticəsində nail olunub: “Malyariya ilə mübarizədə uğur həm də Ümumdünya Səhiyyə Təşkilatının aparıcı mövqe tutduğu tərəfdaşların uzun illər hərtərəfli dəstəyi sayəsində mümkün olub”, - deyə Azərbaycanın səhiyyə naziri fikrini tamamlayıb.
Səmimi qəbula və qonaqpərvərliyə görə minnətdarlığını bildirən ÜST-nin Qiymətləndirmə Missiyasının üzvü Keyt Karter Azərbaycanın regionda malyariya xəstəliyinin aradan qaldırılmasına və malyariyadan azad ölkə statusunun qorunub saxlanmasına əvəzsiz töhfəsini qeyd edib. Bildirib ki, 2021-ci ilin sentyabr ayında Səhiyyə Nazirliyinin rəhbərliyi Azərbaycanda malyariya xəstəliyinə yoluxmanın kəsilməsi üzrə sertifikatlaşdırma prosesinə başlamaqla bağlı ÜST-nin Baş direktoru Tedros Adhanom Gebreyesusa rəsmi müraciət ünvanlayıb. Bu proses çərçivəsində 2022-ci il mayın 16-dan 20-nə kimi ÜST-nin sertifikatlaşdırma missiyası Azərbaycanda səfərdə olub. Bundan əlavə, bu ilin iyun ayında Səhiyyə Nazirliyi “Azərbaycan Respublikasında malyariyaya qarşı mübarizə üzrə Milli Hesabat”ı tələb olunan sənədlər paketi ilə birlikdə ÜST-nin Malyariyaya Nəzarət üzrə Qlobal Proqramına təqdim edib.
Qiymətləndirmə Missiyasının malyariyaya nəzarət sisteminin ayrı-ayrı komponentləri ilə iki həftəlik işinin nəticəsi olaraq və ölkədə görülən işlərin nəticələrinə əsasən, ÜST tərəfindən Azərbaycanın “malyariyadan azad” ölkə kimi sertifikatlaşdırılması gözlənilir.

---

---