Səhiyyə Nazirliyinin "Həkim axtarış sistemi” elektron xidməti "Elektron hökumət” portalına inteqrasiya edilərək vətəndaşların istifadəsinə verilib.
AZƏRTAC "Elektron hökumət” portalının operatoru Məlumat Hesablama Mərkəzinə istinadla bildirir ki, vətəndaşlar bu elektron xidmət vasitəsilə asanlıqla həkimlərin işlədiyi müəssisə, onların vəzifəsi, təhsili, əlaqə nömrəsi və s. barədə informasiyaları əldə edə biləcəklər. Bunun üçün "Elektron hökumət” portalında Səhiyyə Nazirliyinin elektron xidmətləri arasından "Həkim axtarış sistemi” elektron xidmətini seçib, həkimin adı, soyadı, ixtisası, işlədiyi şəhər və ya rayon barədə məlumatları daxil etmək lazımdır. Vətəndaşlar bu xidmətdən autentifikasiyadan keçmədən yararlana bilərlər.
Qeyd edək ki, Səhiyyə Nazirliyi tərəfindən portal üzərindən artıq 33 elektron xidmət təqdim olunub.

---

---