Standartlaşdırma sistemini təkmilləşdirmək, daxili və xarici bazarda rəqabətə davamlı tibbi avadanlıqları istehsal etmək və həmin malların beynəlxalq norma və qaydalara uyğunlaşdırılmasını, o cümlədən insanların həyat və sağlamlığının qorunmasını təmin etmək məqsədilə bu il sentyabrın 27-də Standartlaşdırma İnstitutu tərəfindən inyeksiya üçün birdəfəlik steril şprislərə dair beynəlxalq standart əsasında işlənib hazırlanmış dövlət standartı qəbul edilib və noyabrın 1-dən qüvvəyə minib.
Bununla əlaqədar Analitik Ekspertiza Mərkəzində (AEM) idxalçı şirkətlər üçün iclas təşkil edilib.
Toplantıda Mərkəzin mütəxəssisləri inyeksiya üçün birdəfəlik steril şprislər üçün yeni standartlar, bu şprislərin idxalı zamanı tələb olunan sənədlər toplusuna əlavə olunmuş sənədlər haqqında məlumat veriblər.
Şirkət nümayəndələrini maraqlandıran suallar cavablandırılıb.
Yeri gəlmişkən, son zamanlar bəzi kütləvi informasiya vasitələrində keyfiyyətsiz şprislərin dövriyyəyə buraxılması barədə məlumatlar yer alıb. Bununla əlaqədar olaraq AEM-in İctimaiyyətlə əlaqələr şöbəsindən bildirilib ki, Analitik Ekspertiza Mərkəzinə heç bir vətəndaşdan standartlara uyğun olmayan şprislərlə bağlı şikayət daxil olmayıb.
Həmçinin qeyd edilib ki, vətəndaşların hər hansı şikayəti yarandığı təqdirdə qurumun qaynar xətt nömrələrinə (012 596 07 12, 012 594 57 27, 012 594 57 37) zəng edərək, yaxud e-mail ünvanına ([email protected]) yazaraq və ya AEM-in “Bir pəncərə” xidmətinə yaxınlaşaraq, şikayətləri bildirmək olar. Hər bir şikayət dərhal araşdırılır.

---

---