Səhiyyə Nazirliyi ölkəmizdə dərmanların keyfiyyətinə, dərman bazarında qayda-qanuna daim nəzarət edir. Nazirliyin mətbuat xidməti 2016-cı ilin birinci yarımilliyində bu sahədə görülmüş işlər barədə məlumata yayıb.
Bildirilir ki, dərman vasitələrinin istifadə təlimatlarının təsdiq olunması prosedurunun sürətləndirilməsi üçün Səhiyyə Nazirliyinin Analitik Ekspertiza Mərkəzinda tərcümə xidməti yaradılıb.
“Dərman vasitələrinin dövlət qeydiyyatına alınması və reyestrinin aparılması Qaydaları”nın 4.2-ci maddəsində dövlət qeydiyyatı üçün təqdim edilmiş sənədlərin ilkin ekspertizasının aparılmasına dair müqavilənin bağlanması və bu müqavilə əsasında rüsumun ödənilməsi nəzərdə tutulsa da, bu prosedura 2016-cı ilə qədər riayət olunmurdu. Bunu nəzərə alaraq Tarif (qiymət) Şurası ilə danışıqlar aparılıb və ilkin ekspertizanın həyata keçirilməsi üçün tarif təsdiqlənib.
2016-cı ilin birinci yarımilliyində dərman vasitələrinin qeydiyyatının aparılmasına dair qanunvericilik bazasının təkmilləşdirilməsi məqsədi ilə təkliflər hazırlanıb. Farmakonəzarət xidmətinin yaradılması məqsədilə müvafiq qaydalar işlənib, bu sahə üzrə fəaliyyət göstərəcək mütəxəssislər təlim keçmək üçün xarici ölkəyə göndərilib. Hazırda dərman vasitələrinin dövlət qeydiyyatına alınmasının elektron sisteminin yaradılması istiqamətində tədbirlər hazırlanır. Bununla yanaşı, dünyanın bir sıra iri dərman istehsalçılarının zavodlarına baxış keçirilməsi üçün səfərlər təşkil edilib. Qazaxıstanın Dərman vasitələri, tibbi avadanlıq və tibbi ləvazimatların Milli Ekspertiza Mərkəzi ilə əməkdaşlıq memorandumu hazırlanıb.
2016-cı ilin mart ayından Mərkəzdə “Bir pəncərə” xidməti fəaliyyətə başlayıb. Müasir texnoloji-innovativ bilik və bacarıqların praktiki əldə olunması məqsədilə ümumilikdə 30-dan çox əməkdaş yerli və beynəlxalq təlimlərdə iştirak edib. Mərkəzin struktur quruluşu təkmilləşdirilib, strateji planı təsdiqlənib. Həmçinin Mərkəzin tamamilə yenilənmiş rəsmi elektron saytı (www.pharma.az) sahibkarların və əhalinin istifadəsinə verilib. Yeni tətbiq olunan axtarış sistemləri vasitəsilə dövlət qeydiyyatına alınmış dərman vasitələri, dərman vasitələrinin Tarif (qiymət) Şurası tərəfindən təsdiqlənmiş qiymətləri, aptek təşkilatları barədə məlumatlar əldə etmək olar. Gələcəkdə kargüzarlıq işlərinin daha operativ aparılmasını təmin etmək məqsədilə elektron kargüzarlıq sisteminin yaradılması üçün də işlər görülür.
Hazırda “Dərmanların keyfiyyətinə nəzarət (inspeksiya) şöbəsi” yeni struktur dəyişikliyinə uyğun olaraq “Əczaçılıq subyektləri ilə iş şöbəsi” adı ilə öz iş fəaliyyətini davam etdirir. Şöbənin müasir elmi-texniki tərəqqinin tələblərinə cavab verən yeni texniki avadanlıqlar və əyani vəsaitlərlə təmin edilməsi prosesi uğurla davam etdirilr. Şöbənin işçilərinin mütəmadi təlim və monitorinqlərdə iştirakını təmin etmək məqsədilə GPP (“Etibarlı aptek təcrübəsi”), GDP (“Etibarlı distribyutor təcrübəsi”) və GMP (“Etibarlı istehsalat təcrübəsi”) kimi yeniliklərin tətbiqi üzrə qarşılıqlı elmi-praktiki mübadilə əsasında partnyorlarla əsaslı işbirliyinin yaradılması prosesinə çox böyük önəm verilir. Ona görə də əczaçılıq bazarında mövcud olan və ölkəyə idxal edilən dərman vasitələrinin, tibbi avadanlıqların və köməkçi tibbi vasitələrin hərəkətliliyinin daim nəzarətdə saxlanması üçün distribyutorlarla əməkdaşlığın vahid mənbədən idarə olunması prosesində görüləcək işlərin artıq ilkin mənbəyi yaradılıb.
Məlumatda qeyd edilib ki, Səhiyyə Nazirliyi Analitik Ekspertiza Mərkəzinin ”Qaynar xətt”inə 2016-cı ilin birinci yarımilliyi ərzində ayrı-ayrı vətəndaşlardan və müxtəlif təşkilatlardan daxil olan şikayət və sorğu xarakterli müraciətlərin qanuna müvafiq şəkildə cavablandırılması, şikayətlərin operativ həlli və vətəndaşların ətraflı məlumatlandırılması məqsədi ilə cavabdeh şöbənin fəaliyyəti gücləndirilib. Əczaçılıq sahəsində mövcud olan neqativ halların aradan qaldırılması, şöbənin fəaliyyətinin müvəffəqiyyətlə davam etdirilməsinin nəticəsi kimi, Səhiyyə Nazirliyinə müxtəlif subyektlər tərəfindən təşəkkür məzmunlu müraciətlər daxil olur.

---

---