Dərmanların içlik vərəqəsinin yeni standartı
Son günlərdə 110 addan çox idxal dərman vasitəsinin qaydalara uyğun olmadığı aşkar edilib
Dərman vasitələrinin qablaşdırması və içlik vərəqəsi Azərbaycan Respublikasının qanunvericiliyinə və hüquqi normativ aktlarına uyğun olmalıdır. Aparılan monitorinqlər bu sahədə müəyyən çatışmazlıqların mövcudluğunu göstərir. Belə ki, son günlərdə 110 addan çox dərman vasitəsinin ölkəyə idxalı zamanı içlik vərəqəsi və ya qablaşdırma ilə bağlı uyğunsuzluqların olduğu aşkar edilib.
Bu sahədə mövcud problemlər Səhiyyə Nazirliyinin Analitik Ekspertiza Mərkəzində (AEM) keçirilmiş toplantıda geniş müzakirə olunub. Xarici dərman vasitələri istehsalçılarının yerli nümayəndəliklərinin, ölkəmizdə fəaliyyət göstərən distribüter şirkətlərinin və topdansatış müəssisələrinin nümayəndələrinin, həmçinin AEM-in aidiyyətli şöbələrinin mütəxəssislərinin iştirak etdiyi iclasda dərman vasitələrinin ölkəyə idxalı zamanı içlik vərəqələri və qablaşdırma ilə bağlı qaydalardan danışılıb.
Tədbiri giriş sözü ilə açan AEM-in direktoru Murad Süleymanov qeyd edib ki, son illərdə Azərbaycanda bütün sahələrdə olduğu kimi, əczaçılıq sahəsində də müsbət dəyişikliklər və inkişaf müşahidə olunur. Ölkəmizdə əczaçılıq üzrə milli tənzimləyici orqan olan Səhiyyə Nazirliyi Analitik Ekspertiza Mərkəzinin də bu inkişafda rolu böyükdür. Əhalinin keyfiyyətli, effektiv və səmərəli dərman vasitələri ilə təminatına nəzarət edən Mərkəz bu sahədə köklü islahatlar aparır. Son aylarda “bir pəncərə xidməti”nin tətbiqi, Dərman vasitələrinin keyfiyyətinə nəzarət laboratoriyasının maddi-texniki bazasının gücləndirilməsi və s. tədbirlər, yeni hüquqi-normativ sənədlərin hazırlanması, işçi heyətin bilik və bacarıqlarının artırılması üçün mütəmadi görülən işlər buna sübutdur.
M.Süleymanov qeyd edib ki, ölkənin dərman bazarında qıtlıq yaranmasının qarşısını almaq məqsədilə dərman vasitələrinin istər dövlət qeydiyyatı, istərsə də idxalı zamanı yaranan çətinliklər aradan qaldırılıb, mövcud prosedurlar sadələşdirilib. Lakin bütün bunlarla yanaşı, dərmanların keyfiyyətinə nəzarət gücləndirilib, bu sahədə tələblər sərtləşdirilib.
İclasda bildirilib ki, AEM-in fəaliyyəti Səhiyyə Nazirliyi, İqtisadiyyat Nazirliyi, Dövlət Gömrük Komitəsi, Tarif Şurası və digər aidiyyətli dövlət qurumları ilə, eləcə də müvafiq özəl təşkilatlarla sıx əlaqəli şəkildə qurulur. Mərkəz tərəfindən görülən işlərin daim qiymətləndirilməsi aparılır, nəticələr barədə əlaqədar qurumlara hesabatlar təqdim olunur, dəyişikliklər və yeniliklər barədə ictimaiyyət məlumatlandırılır.
Toplantıda vurğulanıb ki, ölkəmizdə dərman vasitələri ilə davranışın hüquqi və təşkilatı əsaslarının müəyyən edilməsi və bu sahədə münasibətlərin tənzimlənməsi Azərbaycan Respublikasının “Dərman vasitələri haqqında” Qanununa əsaslanır. Bununla belə, aparılan araşdırmalar bir sıra hallarda qanunvericiliyin tələblərinin pozulduğunu göstərir. Bu pozuntular əksər hallarda ölkəyə idxal edilən dərman vasitələrinin içlik vərəqələri və ya qablaşdırması ilə bağlı olur. Konkret olaraq, ya dərman vasitəsinin qablaşdırması dövlət qeydiyyatından keçən formaya uyğun gəlmir, ya onun içlik vərəqəsi Səhiyyə Nazirliyinin təsdiqlədiyi formaya uyğun olmur, bəzi hallarda isə içlik vərəqəsində məlumatlar Azərbaycan dilində deyil, digər dillərdə yazılır. Bildirilib ki, son günlərdə idxal olunan 110 addan çox dərman vasitəsində belə uyğunsuzluqların olduğu aşkar edilib.
Tədbirdə Analitik Ekspertiza Mərkəzinin direktoru bildirib ki, 2016-cı il iyunun 13-dən etibarən içlik vərəqəsi ilə bağlı yeni standart tətbiq olunmağa başlayır. Qanunvericiliyə görə içlik vərəqəsində göstərilməli olan məlumatlar və onların ardıcıllığı nəzərə alınaraq, artıq Mərkəz tərəfindən içlik vərəqəsi nümunəsi hazırlanıb.
İclasda müzakirə olunan məsələlərlə bağlı iştirakçıların sualları cavablandırılıb, təklifləri qeyd olunub, yaranan problemlərin həllində birgə fəaliyyət göstərməyin əhəmiyyəti vurğulanıb.
