Səhiyyə Nazirliyinin Analitik Ekspertiza Mərkəzi Azərbaycan Respublikası Nazirlər Kabinetinin 2019-cu il 27 noyabr tarixli 460 nömrəli Qərarı ilə təsdiq edilmiş “Dərman vasitələrinin geri çağırılması Qaydası”nın 9.1 bəndini rəhbər tutaraq, “Diprospan” ticarət adlı preparatın bəzi seriyalarını satışdan çıxarıb.
Belə ki, tərkibi 1 ml suspenziyada 6,43 mq betametazon dipropionat (5 mq betametazona bərabər), 2,63 mq betametazon sodium fosfat (2 mq betametazona bərabər) tərkibli, şüşə ampullarda 1 ml inyeksiya üçün suspenziya №5, plastik qablaşmada, karton qutuda olan dərman vasitələrinin U038559 seriyalı, son istifadə tarixi 10/2023 olan, W002245 seriyalı, son istifadə tarixi 11/2023 olan, W009991 seriyalı, son istifadə tarixi 01/2024 olan, W015391 seriyalı, son istifadə tarixi 03/2024 olan, W025079 seriyalı, son istifadə tarixi 06/2024 olan və W033463 seriyalı, son istifadə tarixi 08/2024 olan seriyaları satışdan geri çağırılıb.
Analitik Ekspertiza Mərkəzindən bildirildiyinə görə, adıçəkilən dərman vasitəsinin istehsalçısı olan “Organon Central East GmbH” (İsveçrə) şirkəti könüllü olaraq dərmanın bu seriyalarının geri çağırılması haqqında müraciət edib. Bu müraciətə əsaslanaraq preparatın həmin seriyalarının geri çağırılması, topdan və pərakəndə satışının və idxalının qadağan edilməsi haqqında qərar qəbul edilib.
Bu o deməkdir ki, sözügedən dərman vasitəsinin yalnız göstərilən seriyaları ilə buraxılan dərmanlar istifadəyə yararsızdır.

---

---