Etibarlı İstehsalat Təcrübəsi dərman vasitələrinin keyfiyyəti üzərində nəzarət mexanizmlərindən biri olub, GMP (Good manufacturing practice) abreviaturu ilə qeyd edilir. Dərman vasitələrinin istehsal prosesinin yüksək səviyyədə təşkili hazırda məhz GMP tələbləri əsasında aparılır. Bu tələblər dərman vasitələrinin istehsalının bütün mərhələlərini tənzimləyir.
Dərman vasitəsi istehsalçılarının yoxlanılması müasir dövrdə dünyada çox geniş tətbiq edilən təcrübədir. Azərbaycana idxal olunan dərman vasitələrinin daim yüksək keyfiyyətə, təhlükəsizliyə və effektivliyə malik olmasını təmin etmək üçün bəzi hallarda istehsalçı şirkətlərin təftişinə ehtiyac yaranır. Məhz GMP yoxlamalar istehsalçının istehsalat prosesini hansı səviyyədə təşkil etdiyini, eləcə də onun ümumi potensialını aşkar etməyə imkan verir.
Bütün bunları nəzərə alaraq, ölkəmizdə əczaçılıq sektorunda tənzimləyici qurum olan Analitik Ekspertiza Mərkəzinin mütəxəssisləri tərəfindən GMP təftişi həyata keçirilir. Mərkəz tərəfindən 2016-cı ilin may ayından aparılan bu təftişlərin məqsədi dərman vasitələrinin istehsal olunduğu zavodlarda istehsalat prosesinin əyani yoxlanması və ona nəzarətdir. İlk təftişdən 2022-ci ilin fevral ayınadək olan müddətdə 27 ölkənin 80 dərman vasitəsi istehsalçı şirkətində 2-si onlayn (distant) olmaqla, ümumilikdə 86 Etibarlı İstehsalat Təcrübəsi təftişi həyata keçirilib. Bu fəaliyyətə Mərkəzin 20 mütəxəssisi cəlb edilib.

---

---