Avropa Dərman Agentliyinin 2019-cu il 15 fevral tarixli “Ürək ritm problemləri yaratması ilə bağlı potensial risk səbəbindən fenspirid tərkibli dərman vasitələrinin qeydiyyatının dayandırılması” adlı sənədi dərc edilib. Sənədə əsasən, Avropa Dərman Agentliyinin (EMA) farmakonəzarət üzrə risklərin qiymətləndirilməsi komitəsi (PRAC) uşaq və yeniyetmələrdə ağciyər xəstəlikləri ilə əlaqədar yaranan öskürəyin aradan qaldırılması üçün istifadə olunan fenspirid tərkibli dərman vasitələrinin Avropa İttifaqında qeydiyyatının dayandırılması təklifini irəli sürüb.
Səhiyyə Nazirliyinin mətbuat xidmətindən bildiriblər ki, qeydiyyatın dayandırılması pasiyentlərin qorunması məqsədilə aparılan tədbirdir. Belə ki, əvvəllər həmin dərmanları qəbul edən xəstələrdə ürək ritminin problemləri aşkar edilib. Fenspirid və ürək ritm problemləri arasındakı potensial əlaqəni araşdırmaq üçün fenspirid tərkibli dərman vasitələrinin ürək kardioqramında intervalın uzanma potensialına malik olduğunu göstərmək üçün heyvanlar üzərində tədqiqatlar aparılıb. PRAC mövcud sübutları araşdıraraq Avropa İttifaqında fenspirid tərkibli dərman vasitələri barədə tövsiyələr verir. Qiymətləndirmə başa çatdıqdan sonra EMA məlumat verməyi, pasiyent və tibb işçilərinə yenilənmiş rəhbərlik təqdim etməyi planlaşdırır.
Bütün bunları nəzərə alaraq, Səhiyyə Nazirliyi Farmakoloji və Farmakopeya Ekspert Şurası tərəfindən fenspirid tərkibli dərman vasitələrinin təhlükəsizliyi və risk-fayda nisbəti araşdırılır.
Bu prosesin davam etdiyi müddətdə əhalinin sağlamlığının qorunması və pasiyentlərin potensial riskdən qorunması məqsədilə fenspirid tərkibli dərman vasitələrinin - "Les Laboratoires Servier İndustrie” (Fransa) şirkətinin istehsalı olan “Erespal” preparatının və "World Medicine İlaç Sanayi ve Ticarət A.Ş.” (Türkiyə) istehsalı olan “Tirfens” preparatının bütün seriyaları geri çağırılıb.

---

---