Ölkəmizdə nikaha daxil olmaq istəyənlərin icbari tibbi müayinəsi tətbiq olunduğu vaxtdan bu ilin yanvar ayının sonuna qədər 238 509 nəfər tibbi müayinədən keçib. Yalnız 2017-ci ilin yanvar ayı ərzində nikaha daxil olmaq istəyən 10 215 nəfər müayinə edilib.
Bu barədə Səhiyyə Nazirliyinin mətbuat xidmətindən verilən məlumata görə, ümumilikdə, müayinədən keçən şəxslərin əksəriyyətinin sağlamlıq durumu qənaətbəxş olub. Bununla belə, onların bəzilərində müxtəlif infeksiyalar və talassemiya daşıyıcılığı aşkarlanıb. Müayinələr nəticəsində ailə qurmaq istəyən 10 501 nəfərdə talassemiya daşıyıcılığı, 935 nəfərdə sifilis, 166 nəfərdə isə İİV infeksiyası müəyyən edilib.

---

---