Son illər Azərbaycanda psixi sağlamlıq sahəsinin inkişafına, xüsusilə də uşaqların psixi sağlamlığına daha çox diqqət ayrılır. Səhiyyə Nazirliyinin bu sahədə gördüyü işlərin davamı olaraq, Psixi Sağlamlıq Mərkəzində “Uşaqlarda emosional və davranış pozuntuları” mövzusunda beşgünlük treninq keçirilib.
Avropa İttifaqının maliyyə dəstəyi ilə reallaşan “Azərbaycanda yuvenal ədliyyə islahatı məqsədilə uşaq psixi sağlamlığı üzrə müasir xidmətlərin sınaqdan keçirilməsi” layihəsi çərçivəsində həyata keçirilən təlimin məqsədi həmin layihə üzrə yaradılmış “Ailəyə Yardım Mərkəzi"nin komandasına spesifik biliklər təqdim etməkdir.
“Psixiatriyada Qlobal Təşəbbüs” Beynəlxalq İctimai Birliyinin Gürcüstan nümayəndəliyinin əməkdaşları Nino Maxaşvili və Cana Cavaxişvili tərəfindən aparılan treninqdə iştirakçılar ehtiyacı olan ailələrə zəruri xidmətlər göstərmək üçün bilik və bacarıqlar əldə ediblər. Bu xidmətlər xüsusilə autizm spektrli xəstəliklərdən əziyyət çəkən uşaqlar və onların valideynləri üçün nəzərdə tutulub və təhlükəli davranış problemlərinin qarşısının alınmasında mühüm əhəmiyyət kəsb edir.

---

---