Azərbaycanda nikaha daxil olmaq istəyənlərin icbari tibbi müayinəsi tətbiq olunduğu vaxtdan bu il noyabr ayının sonuna qədər müayinədən 219 256 nəfər keçib.
Bu barədə Səhiyyə Nazirliyinin mətbuat xidmətindən verilən məlumaqda bildirilib. Qeyd olunur ki, 2015-ci il iyunun 1-dən bu il noyabrın 30-dək müayinələrdən keçmiş şəxslərin əksəriyyəti yoxlanılan xəstəliklər baxımından sağlam olub. Bununla belə, onlardan bəzilərində müxtəlif xarakterli infeksiyalar və qan xəstəlikləri aşkarlanıb. Belə ki, müayinələr nəticəsində 9892 nəfərin talassemiya daşıyıcısı olduğu müəyyən edilib, 828 nəfərdə sifilis, 147 nəfərdə isə İİV infeksiyası aşkar olunub.
Qeyd edək ki, tibbi müayinə və məsləhətlər nikaha daxil olmaq istəyən şəxslərin və ya onlardan birinin yaşayış yeri üzrə Səhiyyə Nazirliyi tərəfindən müəyyən edilmiş dövlət və bələdiyyə tibb müəssisəsində həyata keçirilir. Tibbi müayinə və məsləhətlərin verilməsi pulsuzdur.

---

---