Azərbaycanın xarici işlər naziri Elmar Məmmədyarov ölkəmizə səfərə gələn Ümumdünya Səhiyyə Təşkilatının (ÜST) Avropa Regional Bürosunun direktoru Jujanna Yakab ilə görüşüb.
Birinci Avropa Oyunlarının keçirilməsi münasibətilə ölkəmizi təbrik edən Jujanna Yakab Azərbaycanın son dövrlərdə uğurla inkişaf etdiyini, səhiyyə və sosial sahələrdə bir sıra uğurlar əldə olunduğunu deyib. O həmçinin Ümumdünya Səhiyyə Təşkilatı çərçivəsində həyata keçirilən layihələrdə Azərbaycanın donor ölkə kimi fəal iştirak etdiyini, bu səbəbdən qurumun ölkəmizlə münasibətləri genişləndirmək niyyətində olduğunu diqqətə çatdırıb.
Azərbaycanın ÜST ilə sıx əməkdaşlıq etdiyini bildirən nazir Elmar Məmmədyarov bu qurumun bir sıra xəstəliklərlə mübarizədə ölkəmizə göstərdiyi yardımı yüksək qiymətləndirib.
Görüşdə həmçinin qarşılıqlı maraq doğuran məsələlər ətrafında fikir mübadiləsi aparılıb.

---

---