Səhiyyə Nazirliyinin İctimai Səhiyyə və İslahatlar Mərkəzi (İSİM) Daxili İşlər Nazirliyinin (DİN) Polis Akademiyasında zabit və kursantların iştirakı ilə 7 Aprel – Ümumdünya Sağlamlıq Gününə həsr olunan “Zərərli vərdişlərdən uzaq ol!” mövzusunda maarifləndirici tədbir keçirib.
Sağlam həyat tərzini təbliğ etmək, gənc nəsli zərərli vərdişlərin sağlamlığa mənfi təsirləri barədə maarifləndirmək məqsədi daşıyan tədbirdə Polis Akademiyasının Tibb sanitariya hissəsinin rəisi, tibb xidməti mayoru Əlinur Hüseynli ölkəmizdə gənclərin sağlam inkişafının daim diqqət mərkəzində saxlanıldığını, bu sahədə həyata keçirilən məqsədyönlü tədbirlərin böyük əhəmiyyət daşıdığını vurğulayıb.
İSİM-in Səhiyyə kommunikasiyası şöbəsinin müdiri Laura Quliyeva sağlam həyat tərzinin əsas istiqamətləri barədə gələcək asayiş keşikçilərinə ətraflı məlumat verib: “7 Aprel – Ümumdünya Sağlamlıq Günü 1950-ci ildən etibarən qeyd olunur və günün builki şüarı “Hər kəs üçün sağlamlıq”dır. Unutmayaq ki, zərərli vərdişlər yalnız ona aludə olanların deyil, ətrafdakı digər insanların da sağlamlığına təhlükəli təsir edir. Odur ki, zərərli vərdişlərə qarşı həyata keçirilən tədbirlərin mahiyyəti hər kəsin sağlamlığını qorumaq, eyni zamanda, ətraf mühiti mühafizə etməkdir”.
İSİM-in İctimai sağlamlıq şöbəsinin müdiri Tofiq Musayev geniş təqdimatla çıxış edərək, tütünün insan orqanizminə və ətraf mühitə zərərli təsirindən danışıb: “Passiv tütünçəkmə, yəni özü istifadə etməsə də, ətrafdakı tütün tüstüsünün zərərli təsiri nəticəsində hər il 1 milyon insan həyatını itirir. Tütünçəkmə nəticəsində hər gün ətraf mühitə 10 milyard toksik siqaret kötüyü atılır və il ərzində siqaret kötüklərindən 770 min ton tullantı əmələ gəlir. Bu zərərli vərdişdən qurtulmaq istəyənlər “Tütündən imtina et!” mobil əlavəsini yükləyə və tütündən imtina üzrə Qaynar xəttimizə (050 800 70 45) müraciət edə bilərlər”.
Tədbirdə bir daha gənclərə sağlam həyat tərzi seçmək, zərərli vərdişlərdən uzaq olmaq və sağlamlığın qorunması istiqamətində ölkəmizdə görülən məqsədyönlü tədbirlərə töhfə vermək tövsiyə olunub, iştirakçılara İSİM tərəfindən hazırlanaraq çap edilən maarifləndirici materiallar paylanılıb.

---

---