Bakıda fəal uzunömürlülük sahəsində ən parlaq beynəlxalq mütəxəssislərin iştirakı ilə “Viva La Vida” Beynəlxalq Uzunömürlülük Konqresi təşkil edilib. Dövrümüzün ən fundamental məsələlərindən birinə toxunan konqres təkcə Azərbaycanda deyil, ümumiyyətlə, regionda ilk dəfə olaraq keçirilib.
“Viva La Vida” Beynəlxalq Uzunömürlülük Konqresində səhiyyə nazirinin müavini İlqar Qasımov, İcbari Tibbi Sığorta üzrə Dövlət Agentliyinin İdarə Heyətinin sədr müavini Nigar Bayramova, Tibbi Ərazi Bölmələrini İdarəetmə Birliyinin (TƏBİB) icraçı direktorunun müavini Araz Nəsirov çıxış ediblər.
AZƏRTAC xəbər verir ki, toplantıda müxtəlif ölkələrdən olan nüfuzlu mütəxəssislər rahat uzunömürlülük problemlərini həll edən dünya tədqiqatları barədə məlumat veriblər. Qeyd edilib ki, Azərbaycan qədim zamanlardan uzunömürlülər diyarı kimi tanınır, bu fenomen araşdırılır və təbliğ olunur.
“Viva La Vida” konqresinin təşkilatçılarından biri, “Sea Breeze Anti-Aging Center” sağlamlıq kompleksinin yaradıcısı Həcər Cəfərova tədbirlə bağlı deyib: “Uzunömürlülük hüceyrə səviyyəsindən başlayır və genetikadan, ətraf mühitdən və həyat tərzindən asılıdır. Biz bunu fiziki və əqli bərpaya vahid yanaşma yolu ilə uzunömürlülük səyahətində tibb və insan təcrübəsini yenidən təsəvvür etmək missiyamız kimi görürük”.
Konqres çərçivəsində Azərbaycanda fəaliyyətə başlayan "Caspi Mayr” unikal sağlamlıq kompleksinin təqdimatı olub. Bu, tamamilə yeni mərkəzdir ki, burada Azərbaycanda ilk dəfə olaraq Mayr sağlamlıq konsepsiyasına uyğun olaraq hazırlanmış, patentləşdirilmiş detoks proqramından keçmək mümkün olacaq. Proqram bir çox beynəlxalq mükafatlara layiq görülüb və ən yaxşısı kimi tanınıb. Kompleks Xəzər dənizinin sahilində yerləşir və burada dəniz havası yalnız bu terapevtik texnikanın bütün üstünlüklərini artırır.
“Viva La Vida” Beynəlxalq Konqresi çərçivəsində uzunömürlülük məsələlərinə həsr olunmuş sərgi də keçirilib. Burada iştirakçılar yaşlanma əleyhinə təklif olunan innovativ xidmətlər və həllərlə tanış olublar.

---

---