Səhiyyə Nazirliyində Ümumdünya Səhiyyə Təşkilatının (ÜST) “İmmunlaşdırma üzrə İnformasiya Sistemlərinin qiymətləndirilməsi Missiyası”nın ölkəmizdə işgüzar səfərdə olan nümayəndə heyəti ilə görüş keçirilib.
Nazirliyin mətbuat xidməti bildirir ki, görüşdə Azərbaycan Respublikası səhiyyə nazirinin Səhiyyənin rəqəmsallaşdırılması üzrə müşaviri Rüfət Hacıəlibəyov və Səhiyyə Nazirliyinin İctimai səhiyyə və sanitariya-epidemioloji nəzarət şöbəsinin müdiri Nəzifə Mürsəlova ölkəmizin ÜST ilə əməkdaşlığa böyük önəm verdiyini vurğulayıblar. Qeyd olunub ki, uşaqların sağlamlığının qorunması dövlətin daim diqqət mərkəzindədir. İmmunlaşdırma proqramı peyvəndlərlə idarə olunan xəstəliklərin profilaktikasına istiqamətləndirilib və dövlət tərəfindən daim dəstəklənir.
Səmimi qarşılanmaya görə minnətdarlığını bildirən qonaqlar qeyd ediblər ki, Missiyanın məqsədi Azərbaycanda immunizasiya tədbirlərinin planlaşdırılması, idarə olunması, həyata keçirilməsi, qeydiyyat və hesabatverməyə dair imkanların nəzərdən keçirilməsi, eyni zamanda, xarici ekspertlər tərəfindən qiymətləndirilməsi və təkmilləşdirilməsi istiqamətində gələcək addımların müəyyən edilməsindən ibarətdir.
Qeyd edilib ki, ÜST-nin missiyası çərçivəsində ölkə, regional və yerli səviyyələrdə immunizasiya tədbirlərində iştirak edən müəssisələrə səfərlər nəzərdə tutulub.

---

---