Səhiyyə Nazirliyi Milli Onkologiya Mərkəzinin (MOM) əməkdaşları Kanadanın Vankuver şəhərində ABŞ Nüvə Təbabəti Cəmiyyətinin illik beynəlxalq konfransında tədqiqatlarının nəticələrini təqdim ediblər.
MOM-dan verilən məlumata görə, dünyanın 100-dən artıq ölkəsindən iştirakçıların qatıldığı həmin tədbirdə Milli Onkologiya Mərkəzinin Nüvə təbabəti şöbəsinin müdiri, tibb elmləri üzrə fəlsəfə doktoru Fuad Novruzovun başçılığı ilə Azərbaycan nümayəndə heyəti iştirak edib.
Azərbaycanlı onkoloqlar süd vəzi və prostat vəzi xərçənginin diaqnostika və müalicəsinə aid elmi işlərlə tədbirin əsas sessiyasında məruzə ilə çıxış ediblər. Sevindirici haldır ki, süd vəzi xərçənginin müalicə taktikasına əsaslanan elmi iş tədbirin “Ən Yaxşı Beynəlxalq Elmi İş" (International Best Abstract Award) mükafatına layiq görülüb.

---

---