Yaponiyanın Azərbaycandakı səfirliyində bu ölkənin “Ot kökləri və insan təhlükəsizliyi” qrant yardımı proqramı çərçivəsində “Şamaxı rayonunun Mədrəsə qəsəbəsində yeni tibb məntəqəsinin inşası” layihəsi üzrə qrant müqaviləsinin imzalanması mərasimi keçirilib.
AZƏRTAC-ın verdiyi məlumata görə, qrant yardımı müqaviləsini “Konstitusiya” Araşdırmalar Fondunun sədri Əliməmməd Nuriyev və səfir Vada Cüniçi imzalayıblar.
Mərasimdə çıxış edən səfir Vada Cüniçi layihənin həmin bölgənin əhalisinin səhiyyə, təhsil, sosial rifahına və iqtisadi inkişafına töhfə verməsini arzulayıb. Əliməmməd Nuriyev yardıma görə Yaponiya hökumətinə minnətdarlığını bildirib.
Müqavilədə nəzərdə tutulan yardımın məbləği 55 min ABŞ dolları təşkil edir. Bu layihənin icrası nəticəsində Şamaxı rayonunun Mədrəsə qəsəbəsində yeni kiçik tibb məntəqəsi inşa olunacaq.
Qeyd edək ki, indiyədək “Ot kökləri və insan təhlükəsizliyi” qrant yardımı proqramı çərçivəsində Azərbaycanda 265 layihə həyata keçirilib, onların ümumi dəyəri 22 milyon ABŞ dollarından çox olub. Əhalinin sağlamlığı və həyatının təhlükəsizliyi, minimum həyat standartlarının təmin olunması proqramın əsas prioritetləridir.

---

---