Azərbaycan Tibb Universitetinin (ATU) Bioloji kimya kafedrasında seminar keçirilib.
Universitetin Beynəlxalq əlaqələr şöbəsinin müdiri Müşfiq Orucov seminarda təhsil ocağının beynəlxalq əlaqələrinin getdikcə genişlənməsi barədə danışıb. O, ATU-nun qonağı – Ukraynada İvan Franko adına Droqobıç Dövlət Pedaqoji Universitetinin və Polşada Lublin Katolik Universitetinin professoru Taras Kavetskini salamlayıb.
Ukrayna-Azərbaycan Beynəlxalq Tədqiqat və Təhsil Mərkəzinin Azərbaycan üzrə rəhbəri, Bakı Dövlət Universitetinin kafedra müdiri, professor Rövşən Xəlilov professor Taras Kavetski ilə 7 ildir birgə elmi-tədqiqat işləri apardığını bildirib, materiyanın canlı və cansız aləmini tədqiq edən, pozitron annihilyasiya sahəsində dünyanın aparıcı mütəxəssislərindən biri olan T.Kavetskinin Almaniya, Çin, Slovakiya və dünyanın bir sıra ölkələrində elmi-tədqiqat işləri apardığı barədə danışıb.
Professor T.Kavetski “Laktat əsaslı amperometrik biosensorların təkmilləşdirilməsi üçün yeni polimer matrisalar və nanodaşıyıcılar” mövzusunda məruzə ilə çıxış edib, nanotexnologiyalar, müasir nanosistemlərin ayrı-ayrı sahələrdə, o cümlədən tibb sahəsində uğurla tətbiqi ilə bağlı iştirakçılara geniş məlumat verib.
Sonda qonaq professor seminar iştirakçılarını maraqlandıran sualları cavablandırıb.

---

---