Akademik M.A.Topçubaşov adına Elmi Cərrahiyyə Mərkəzi, Azərbaycan Cərrah və Qastroenteroloqlar Assosiasiyası (ACQA) və Bərdə Müalicə Diaqnostika Mərkəzinin təşkilatçılığı ilə Bərdə şəhərində cərrahiyyənin aktual problemlərinə həsr olunmuş regional elmi-praktiki konfrans keçirilib.
İki gün davam edən konfrans Səhiyyə Nazirliyinin Elmi Tibbi Şurası tərəfindən akkreditasiya olunaraq 8 kredit balla qiymətləndirilib. Tədbirdə Bərdə, Yevlax, Ağdam, Ağcabədi, Tərtər və Goranboy rayonlarından 100-ə yaxın həkim – cərrahlar, endoskopistlər, anestezioloq-reanimatoloqlar, endokrinoloqlar, kardioloqlar, qastroenteroloqlar iştirak ediblər.
Toplantının ilk günü üç xəstə üzərində açıq və laparoskopik üsulla çətin xolesistektomiya, göbək və qasıq yırtıqlarının ləğvi, refundoplikasiya əməliyyatları icra edilərək, birbaşa konfrans zalına translyasiya olunub. Əməliyyatların gedişi geniş şərh edilib, verilən suallar cavablandırılıb.
Konfransda həmçinin kardioloji, abdominal, endokrin, damar cərrahiyyəsinin, anesteziologiya-reanimatologiyanın aktual problemlərinə həsr olunmuş məruzələr dinlənilib.
Sonda konfrans iştirakçılarına sertifikatlar təqdim edilib.

---

---