2015-ci il iyunun 1-dən başlayaraq, nikaha daxil olmaq istəyən şəxslərin icbari tibbi müayinəsi uğurla tətbiq edilir. Bu ilin noyabr ayında nikaha daxil olmaq istəyən 10 738 nəfər tibbi müayinədən keçib.
Bu barədə B.Eyvazov adına Elmi Tədqiqat Hematologiya və Transfuziologiya İnstitutunun direktoru Zöhrə Əlimirzəyeva məlumat verib. O bildirib ki, ötən ay müayinədən keçənlərdən 325 nəfərində talassemiya daşıyıcılığı, 18 nəfərdə sifilis, 11 nəfərdə isə İİV infeksiyası aşkarlanıb. Müayinələr nəticəsində 38 cütlükdə hər iki nəfərin talassemiya daşıyıcısı olduğu aşkar edilib.
Zöhrə Əlimirzəyeva həmçinin məlumat verib ki, 2017-ci il ərzində 23 hamilə qadında prenatal müayinə aparılıb. Onların dünyaya gətirdiyi 6 körpə talassemiya xəstəsi, 13-ü daşıyıcı, 4-ü isə sağlam doğulub.

---

---