Bu ilin əvvəlindən Səhiyyə Nazirliyinin Kliniki Tibbi Mərkəzinin (KTM) Toksikologiya şöbəsinə “dəm qazından zəhərlənmə” diaqnozu ilə bağlı 190 xəstə daxil olub. Bu, 2016-cı ilin müvafiq dövrünün göstəricisi (455 müraciət) ilə müqayisədə 2,4 dəfə azdır.
Bu barədə Toksikologiya şöbəsinin müdiri, Səhiyyə Nazirliyinin toksikologiya üzrə baş mütəxəssisi Azər Maqsudov jurnalistlərə müsahibəsində məlumat verib. O bildirib ki, hesabat dövründə dərman vasitələrindən zəhərlənmə ilə bağlı müraciətlərin sayında da əhəmiyyətli dərəcədə azalma müşahidə olunur: “Keçən ilin müvafiq dövründə bu diaqnozla 1062 pasiyent daxil olduğu halda, 2017-ci ildə müvafiq rəqəm 602-dir. Sirkə turşusundan zəhərlənmə ilə bağlı 254 müraciət (2016-cı ildə 237 müraciət), allergik zəhərlənmə ilə bağlı 208 müraciət (2016-cı ildə 236 müraciət), göbələkdən zəhərlənmə ilə bağlı 12 müraciət (2016-cı ildə 25 müraciət), uyuşdurucu vasitələrdən zəhərlənmə ilə bağlı 3 müraciət (2016-cı ildə bu cür müraciətlər olmayıb), etanoldan zəhərlənmə ilə bağlı 103 müraciət (2016-cı ildə 86 müraciət) olub. Bundan əlavə, hesabat dövrü ərzində ilan sancması ilə əlaqədar 104 nəfər (2016-cı ilə 90 nəfər), qaraqurd sancması ilə əlaqədar 5 nəfər (bu, 2016-cı ilin müvafiq göstəricisindən iki dəfə azdır) Toksikologiya şöbəsinə müraciət edib”.

---

---