Azərbaycan Tibb Universitetində (ATU) ölkəmizdə epidemioloji vəziyyətə həsr olunmuş brifinq keçirilib.
Tədbirdə çıxış edən Səhiyyə Nazirliyinin epidemiologiya üzrə baş mütəxəssisi, ATU-nun Epidemiologiya kafedrasının müdiri, professor İbadulla Ağayev Azərbaycanda hazırkı epidemioloji vəziyyət barədə jurnalistlərə məlumat verib.
O bildirib ki, bu gün ölkəmizdə nə qrip, nə də qripəbənzər kəskin respirator xəstəliklərin epidemiyası müşahidə edilmir: “Əgər 1000 nəfərdən 10-da qrip varsa, bu, adi haldır. Havaların soyuması ilə əlaqədar olaraq, bütün dünyada olduğu kimi, ölkəmizdə də respirator virus infeksiyaları ilə bağlı problemlər meydana çıxır. Bunun epidemioloji həddi keçməməsi səbəbindən əhali kütləvi vaksinasiya olunmur. Lakin özəl klinikalarda qrip əleyhinə peyvəndlənmə aparılır. Hər bir vətəndaş öz istəyi və təşəbbüsü ilə vaksinasiya oluna bilər”.

---

---