Tibbi təhsilin dünya standartlarına çatdırılması əhaliyə göstərilən tibbi yardımın keyfiyyətinin yüksəldilməsində ən əhəmiyyətli məsələlərdən biridir. Bunu nəzərə alan Ə.Əliyev adına Azərbaycan Dövlət Həkimləri Təkmilləşdirmə İnstitutu (ADHTİ) öz işini müasir tələblərə uyğun qurur. İnstitutda tədrisin keyfiyyətini artırmaq məqsədilə dünyanın bir çox ali tibb təhsili müəssisələri ilə təhsil və elmi-pedaqoji kadrların hazırlanması sahəsində müqavilələr bağlanılıb, həmin tədris müəssisələrinin aparıcı mütəxəssisləri Bakı şəhərinə ezam edilir, tələbat hiss olunan ixtisas və mövzular üzrə yerli həkimlər üçün təkmilləşmə kursları keçirlər.
ADHTİ ilə Seçenov adına Birinci Moskva Dövlət Tibb Universiteti arasındakı əməkdaşlıq çox intensiv şəkildə və müxtəlif istiqamətlərdə davam edir. İnstitutda beynəlxalq təhsil proqramı çərçivəsində həmin Universitetin Daxili xəstəliklərin propedevtikası kafedrasının professor-müəllim heyətinin iştirakı ilə qastroenterologiya mövzusunda kurs keçirilməsinə başlanılıb. Dekabrın 15-dək davam edəcək kursda professorlar Yelena Baranskaya, Zinaida Lemeşko, Oleq Şifrin və Tatyana Lapina mühazirələr oxuyur, məşğələlər aparırlar.
Həkimləri Təkmilləşdirmə İnstitutunun Terapiya kafedrasının bazasında keçirilən kursa ölkəmizin müxtəlif regionlarında çalışan qastroenteroloqlar cəlb olunublar.

---

---