ATU-da akkreditasiyaya dair beynəlxalq seminar baş tutub

ATU-da akkreditasiyaya dair beynəlxalq seminar baş tutub

Azərbaycan Tibb Universitetində (ATU) Akkreditasiya və Reytinq üzrə Müstəqil Agentliyin (Independent Agency for Accreditation and Rating - IAAR) təşkilatçılığı ilə “Beynəlxalq akkreditasiya – təhsilin keyfiyyətinin artırılması aləti” mövzusunda beynəlxalq seminar keçirilib.
Universitetdən bildirildiyinə görə, Azərbaycanın bir sıra ali məktəblərinin rektorları və rəhbər şəxsləri, təhsil üzrə beynəlxalq ekspertlər, müəllimlər iştirak edən seminarda ATU-nun rektoru, professor Gəray Gəraybəyli pedaqoji prosesin daim inkişafda olduğunu deyib, təhsildə innovasiya və yeni texnologiyaların tətbiqinin vacibliyini vurğulayıb: “Azərbaycan universitetləri dünya bazarında rəqabətə davamlı kadrlar yetişdirilməsi uğrunda daim inkişaf prosesindədirlər. Lakin bu prosesin uğurlu nəticələnməsi üçün kənardan müstəqil ekspert rəyinin, müstəqil baxışın olması çox önəmlidir. Məhz bu səbəbdən Azərbaycan Tibb Universiteti olaraq dünya miqyaslı reytinq strukturları tərəfindən tanınan Akkreditasiya və Reytinq üzrə Müstəqil Agentliyi seçdik”.
Professor G.Gəraybəyli üç ildən çox davam edən hazırlıq mərhələsi, beynəlxalq akkreditasiya prosesinin gedişatı haqqında iştirakçılara ətraflı məlumat verib. O, ali məktəblər üçün təhsilin keyfiyyətinin artırılması, beynəlxalq nüfuzun yüksəldilməsi, yeni bacarıqların əldə edilməsi baxımından beynəlxalq akkreditasiya prosesinin böyük önəm daşıdığını bildirib.
Sonra IAAR-ın baş direktoru Alina Jumaqulova Azərbaycanın səhiyyə sahəsində ilk dəfə ATU-nun üç ixtisas üzrə tədris proqramını uğurla akkreditasiyadan keçirdiyini deyib. Qlobal reallıqlar fonunda beynəlxalq akkreditasiyanın önəmindən danışan A.Jumaqulova təhsildə keyfiyyətin təminatında IAAR agentliyinin təqdim etdiyi imkanlardan söz açıb. Bildirib ki, akkreditasiya istənilən universitet üçün xarici tələbələrin qəbulu və xarici ölkələrdə diplomların tanınması üçün əhəmiyyətli addım olmaqla yanaşı, həmçinin ali məktəblərin beynəlxalq aləmə inteqrasiyasına töhfə verir.
Daha sonra Akkreditasiya və Reytinq üzrə Müstəqil Agentliyin təmsilçiləri təhsilin keyfiyyətinin artırılması üçün istifadə olunan mexanizmlər, kənar ekspert rəyinin hazırlanmasında meyarlar və digər təqdimatlarla məruzə ediblər. Sonda akkreditasiya prosesi barədə suallar cavablandırılıb.
Qeyd edək ki, IAAR tərəfindən həm təsisat olaraq ali məktəbin, həm də onun tədris proqramlarının akkreditasiyası aparılır. Bu agentlik MDB ölkələri içərisində Dünya Tibb Təhsili Federasiyası (World Federation of Medical Education –WFME) tərəfindən tanınan ilk qurumdur. IAAR tərəfindən akkreditasiya olunan universitetlər və tədris proqramları Dünya Tibb Təhsili Federasiyasının akkreditasiyasını əldə etmiş sayılır.





Dekabr 2022

~ Sonuncu nömrə ~

Bütün nömrələr

Elanlar
ELANLAR

Daha çox

Film və videolar

Daha çox

Sosial reklamlar

Daha çox

Facebook
Səhiyyə Nazirliyinin nəşrləri

İlham Əliyev

Mehriban Əliyeva

Mehriban Əliyeva


Nigar Məcidova