Azərbaycan Respublikasının Prezidenti İlham Əliyev Azərbaycan Respublikası Dövlət Sərhəd Xidmətinin (DSX) hərbi qulluqçularının təltif edilməsi haqqında və DSX-nin hərbi qulluqçularına və mülki işçilərinə fəxri adların verilməsi haqqında iki Sərəncam imzalayıb. Təltif edilənlər arasında tibb işçiləri də var. Belə ki, uzunmüddətli səmərəli fəaliyyətlərinə görə tibb xidməti polkovnik-leytenantı Vəfa Ağayevaya “Əməkdar həkim”, baş gizir Cavahir Hacıxanovaya “Əməkdar tibb işçisi” fəxri adları verilib. Tibb xidməti polkovniki Fərman Allahverdiyev xidməti vəzifələrini yerinə yetirərkən fərqləndiyinə görə“Vətən uğrunda” medalı ilə təltif olunub.
Dövlət başçısı həmçinin Azərbaycan Respublikası Хüsusi Dövlət Mühafizə Хidmətinin (XDMX) hərbi qulluqçularının təltif edilməsi haqqında da Sərəncam imzalayıb. XDMX-nin yaranmasının 25 illiyi münasibətilə, xidməti vəzifələrini yerinə yetirərkən fərqləndiklərinə görə mükafatlandırılanlar arasında da tibb işçisi var – tibb xidməti polkovnik-leytenantı Tünzalə Məlikli “Hərbi хidmətlərə görə” medalı ilə təltif edilib.

---

---