Azərbaycan Respublikasının Prezidenti İlham Əliyev 18 Avqust – Azərbaycan Respublikasının Sərhəd Qoşunları əməkdaşlarının peşə bayramı münasibətilə Dövlət Sərhəd Xidmətinin hərbi qulluqçularına və mülki işçilərinə fəxri adların verilməsi haqqında Sərəncam imzalayıb.
Bu sənədə əsasən uzunmüddətli səmərəli fəaliyyətinə görə fəxri adlarla təltif edilənlər arasında tibb işçiləri də var. Belə ki, tibb xidməti polkovnik-leytenantları Kənan Rafael oğlu Yusif-zadə və Sona Ədalət qızı Fərəcova “Əməkdar həkim” fəxri adı alıblar. Baş gizir Heyranə Tofiq qızı Əlirzayeva isə “Əməkdar tibb işçisi” fəxri adı ilə təltif olunub.
Ölkə başçısının digər bir Sərəncamına əsasən, Azərbaycan Respublikası Xüsusi Dövlət Mühafizə Xidmətində səhiyyə sahəsinin inkişafında xidmətlərinə görə Elşad Belal oğlu Həmidova “Əməkdar həkim” fəxri adı verilib.

---

---