Bakıda bu mövzuda beynəlxalq elmi konfrans olub

Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzi və Mərkəzi Gömrük Hospitalının birgə təşkilatçılığı, “Florence Nightingale” Xəstəxanalar Qrupunun və Britaniya – Azərbaycan Həkimləri və Stomatoloqları Assosiasiyasının dəstəyi ilə “Ana və uşaq sağlamlığı: Multidissiplinar yanaşmalar, perspektivlər və aktual çağırışlar” mövzusunda beynəlxalq elmi konfrans keçirilib.
Tədbirdə açılış nitqi ilə çıxış edən Dövlət Gömrük Komitəsinin Tibbi Xidmət İdarəsinin rəisi Ceyhun Məmmədov ana və uşaq sağlamlığının dövlətin sosial siyasətinin əsas istiqamətlərindən biri olduğunu qeyd edib, Prezident İlham Əliyevin rəhbərliyi ilə bu sahədə mühüm tədbirlərin həyata keçirildiyini, müasir tibbi infrastrukturun formalaşdırılması və əhaliyə göstərilən tibbi xidmətlərin keyfiyyətinin daha da yüksəldilməsi istiqamətində ardıcıl və məqsədyönlü işlərin görüldüyünü bildirib.
Konfransın rəsmi açılış hissəsində Milli Məclisin Səhiyyə komitəsinin sədri Əhliman Əmiraslanov, Milli Məclisin Ailə, qadın və uşaq məsələləri komitəsinin sədri Hicran Hüseynova, səhiyyə nazirinin müavini Nadir Zeynalov, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova və TƏBİB-in icraçı direktorunun müşaviri Töhfə Cəmilova çıxış ediblər.
Daha sonra Dövlət Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin rəisi, Milli Məclisin Səhiyyə komitəsinin sədr müavini Rəşad Mahmudov konseptual məruzə ilə çıxış edib.
Rəsmi qonaqlar çıxışlarında Prezident İlham Əliyevin rəhbərliyi ilə ölkədə səhiyyə sisteminin davamlı inkişafı, müasir tibbi infrastrukturun yaradılması və əhaliyə göstərilən tibbi xidmətlərin keyfiyyətinin yüksəldilməsi istiqamətində həyata keçirilən məqsədyönlü tədbirlərin mühüm nəticələr verdiyini bildiriblər. Həmçinin çıxışlarda ölkəmizdə ana və uşaq sağlamlığının qorunması, uşaqların sağlam böyüməsi və rifahının təmin edilməsi istiqamətində həyata keçirilən tədbirlərdən danışılıb, bu sahədə Birinci vitse-prezident, Heydər Əliyev Fondunun prezidenti Mehriban Əliyevanın təşəbbüsü və dəstəyi ilə reallaşdırılan layihələrin mühüm əhəmiyyət daşıdığı qeyd edilib.
Pediatriya sahəsində “Neonatologiyada multidissiplinar yanaşma: Prenatal diaqnostika, erkən aşkarlanma və müasir müalicə” mövzusunda I panel Ankaranın Yıldırım Beyazit Universitetinin neonatoloqu, professor Ahmet Yağmur Baş və İstanbul “Florence Nightingale” Xəstəxanasının Uşaq sağlamlığı və xəstəlikləri şöbəsinin neonatoloqu, professor Selma Aktaşın moderatorluğu ilə keçirilib.
“Pediatriyada multidissiplinar yanaşma: Erkən diaqnostika, xəbərdaredici əlamətlər və kritik qərarlar” mövzusunda II paneldə moderatorluğu Respublika Pediatriya Mərkəzinin direktoru Erkin Rəhimov və Mərkəzi Gömrük Hospitalının rəis müavini Nahidə Mahmudova ediblər.
“Pediatriyada multidissiplinar yanaşma: Diaqnostika, xəbərdaredici əlamətlər və kritik qərarlar” mövzusunda növbəti panel Azərbaycan Tibb Universitetinin I Uşaq Xəstəlikləri kafedrasının müdiri Rauf Bəylərov və kafedrasının dosenti Nigar Bayramovanın moderatorluğu ilə keçirilib.
Mama-ginekologiya sahəsində “Müasir mamalıqda yeniliklər” mövzusunda I panel Azərbaycan Tibb Universitetinin II Mamalıq və ginekologiya kafedrasının müdiri, professor Hicran Bağırovanın və Ə.Əliyev adına Azərbaycan Dövlət Həkimləri Təkmilləşdirmə İnstitutunun Mamalıq-ginekologiya kafedrasının müdiri, professor Leyla Rzaquliyevanın moderatorluğu ilə baş tutub.
“Müasir ginekologiyada yeniliklər” mövzusunda panel Böyük Britaniyanın Birmingem Qadın və Uşaq Xəstəxanasının mama-ginekoloqu Fidan İsrafil-Bəyli və Azərbaycan Tibb Universitetinin I Mamalıq-ginekologiya kafedrasının professoru Səadət Sultanovanın moderatorluğu ilə keçirilib.
“Klinik halların video təqdimatı” mövzusunda III paneldə moderatorluğu İ.M.Seçenov adına Birinci Moskva Dövlət Tibb Universitetinin Bakı filialının Mamalıq və ginekologiya departamentinin müdiri, prof. İslam Mahalov və Mərkəzi Gömrük Hospitalının Mamalıq-ginekologiya şöbəsinin rəisi Təranə Bayramova ediblər.
Konfrans çərçivəsində ana və uşaq sağlamlığının qorunması, müasir diaqnostika və müalicə üsulları, erkən aşkarlama, prenatal diaqnostika və multidissiplinar yanaşmalarla bağlı aktual məsələlər ətrafında geniş müzakirələr aparılıb. Sessiyalar zamanı mütəxəssislər tərəfindən klinik təcrübələr və elmi yanaşmalar təqdim olunub, mövzular üzrə fikir mübadiləsi keçirilib və iştirakçıların sualları cavablandırılıb.
Qeyd edək ki, “Ana və uşaq sağlamlığı: multidissiplinar yanaşmalar, perspektivlər və aktual çağırışlar” mövzusunda Beynəlxalq Elmi Konfrans Azərbaycan Respublikası Səhiyyə Nazirliyinin “Davamlı Tibbi Təhsil üzrə elm və tədris tədbirlərinin akkreditasiya Qaydaları”na əsasən akkreditasiya olunub və 8 DTT balı ilə qiymətləndirilib.

---

---