Səhiyyə Nazirliyi Analitik Ekspertiza Mərkəzi (AEM) qanunvericiliyə uyğun olaraq, keçən il yanvarın 1-dən etibarən mərhələli olaraq “Dərman Vasitələrinin Təqib və İzləmə Sistemi”nin (DVTİS) tətbiqini təmin edir və bu sahədə nəzarəti həyata keçirir. Mərkəzdən mütəmadi olaraq verilən məlumatlarda qeyd edildiyi kimi, ilkin mərhələdə psixotrop və güclü təsir edən dərman vasitələrinin dövriyyəsinə Daxili İşlər Nazirliyi tərəfindən verilmiş xüsusi icazəyə malik tibb və əczaçılıq müəssisələrində həmin qrup dərman vasitələrinin sistem vasitəsilə izlənilməsi həyata keçirilir.
Növbəti mərhələ olaraq, müəyyən edilmiş altı dərman vasitəsinin izlənilməsinin başlaması səbəbi ilə, həmçinin sistemdən istifadəni mümkün qədər asanlaşdırmaq və optimallaşdırmaq məqsədilə AEM-in Dərman vasitələrini təqib və izləmə şöbəsinin əməkdaşları tərəfindən 10 idxalçı şirkətin nümayəndəsi üçün maarifləndirmə xarakterli görüş təşkil olunub.
Görüşdə izlənilməsi nəzərdə tutulmuş dərman vasitələri, DataMatrix kodun mahiyyəti, sistemin iştirakçıları, idxal bildirişi zamanı hansı məlumatların daxil edilməsi, aptekin satış bildirişi və bu kimi digər vacib məqamlar haqqında məlumat verilib. Təqdim olunan məlumatın daha da yadda qalması üçün nəzəri biliklər təqdim olunduqdan sonra, tədbir əməkdaşlar tərəfindən interaktiv olaraq davam etdirilib.
Görüşün sonunda şirkət nümayəndələrinin onlara çətinlik yaradan məqamlara dair sualları AEM əməkdaşları tərəfindən cavablandırılıb.

---

---