“Nimesil” Azərbaycanda qadağan olunacaqmı?

“Nimesil” Azərbaycanda qadağan olunacaqmı?

Bu yaxınlarda xarici mediada ABŞ-də və Avropada “Nimesil” preparatının qadağan olunması ilə bağlı xəbərlər yayılıb. Qadağanın səbəbi kimi çoxsaylı arzuolunmaz yan təsirlər, o cümlədən mədənin selikli qişasının zədələnməsi, mədədə yanma hissi və qanama, dərmanın toksikliyi səbəbi ilə qaraciyərin zədələnməsi göstərilir. Preparat uzun müddət istifadə edildikdə qaraciyər və böyrək funksiyalarına mənfi təsir göstərə bilər. Yüksək qan təzyiqi, ürək çatışmazlığı və damar problemləri riskini artıra bilər. Qaşınma, dəri səpgiləri və nadir hallarda anafilaktik şok kimi reaksiyalar yarana bilər. Nəfəs darlığı və asqırma kimi simptomlar müşahidə edilə bilər. Xüsusilə uşaqlarda və böyrək çatışmazlığı olan şəxslərdə “Nimesil”in istifadəsi tövsiyə edilmir.
“Nimesil”in və bu qəbildən olan digər preparatların belə yan təsirlərinin olması bəlli faktdır. Bəs bu dərmanlar Azərbaycanda qadağan olunacaqmı?
Səhiyyə Nazirliyi Analitik Ekspertiza Mərkəzinin (AEM) Mətbuat xidməti bununla bağlı açıqlama verib. Bildirilir ki, nimesulid tərkibli preparatların qadağan olunması və ya istifadəsinin məhdudlaşdırılması barədə qərar hər ölkənin məsələyə yanaşmasından asılı olaraq qəbul edilir. Belə ki, ABŞ və Avstraliya kimi bəzi ölkələrdə yüksək risk daşıyan preparatlar dərman bazarından tam yığışdırılır. Türkiyə, Rusiya, Ukrayna, Belarus kimi ölkələrdə isə, əgər riskləri nəzarətdə saxlamaq mümkündürsə, məhdudlaşdırma strategiyası tətbiq olunur. Nimesulid tərkibli preparatların bəzi ölkələrdə, məsələn, ABŞ-də məhdudlaşdırılmasına, yaxud qadağan edilməsinə baxmayaraq, İtaliyada, Türkiyədə, Rusiyada, Ukraynada, Belarusda, Gürcüstanda, Qazaxıstanda dövriyyəsinə icazə verilib.
Azərbaycanda tərkibində nimesulid olan dərmanlar bütün tövsiyələr nəzərə alınmaqla və farmakonəzarət tədbirlərinə riayət olunmaqla qeydiyyatdan keçib.
Preparatın hepatotoksiklik riskini idarə etmək üçün onun istifadə təlimatında müvafiq məlumatlar qeyd olunub. Bu, qaraciyərin zədələnməsi, eləcə də başqa yan təsirlərin olması riskini minimuma endirir. Açıqlamada həmçinin qeyd olunur ki, tərkibində nimesulid olan preparatlar xroniki xəstəliklərin müalicəsi üçün istifadə olunmur. Onlar ağrını qısa müddətdə aradan qaldırmaq üçün nəzərdə tutulub, məhdud göstərişlərlə və hepatotoksiklik riski nəzərə alınmaqla təyin edilir, yalnız həkim resepti ilə buraxılır və 15 gündən çox qəbul edilə bilməz. Azərbaycanda nimesulid tərkibli preparatlar yalnız həkim tərəfindən fayda/risk nisbəti qiymətləndirildikdən sonra təyin oluna bilər.
AEM-dən o da bildirilib ki, belə preparatların təyin olunmasına nəzarətdə “Elektron resept” və “Dərman vasitələrinin monitorinqi və izlənməsi” sistemləri mühüm rol oynayır. Bu sistemlər sui-istifadə hallarının qarşısının alınmasına və dərmanlardan rasional istifadəyə kömək edir.
Qurum həmçinin xatırladır ki, vətəndaşlar dərmanlar, apteklər və özəl tibb müəssisələri ilə bağlı məsələlərlə AEM-in “bir pəncərə” sisteminə, “qaynar xəttinə”, elektron poçtuna və saytına müracət edə bilərlər. Belə hallarda araşdırma aparılır və zəruri hallarda plandankənar yoxlama haqqında qərar qəbul olunur.







Yanvar 2025

~ Sonuncu nömrə ~

Bütün nömrələr

Elanlar
Elanlar

Daha çox

Film və videolar

Daha çox

Sosial reklamlar

Daha çox

Facebook
Səhiyyə Nazirliyinin nəşrləri

İlham Əliyev

Mehriban Əliyeva

Mehriban Əliyeva


Nigar Məcidova