“Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində Səhiyyə Nazirliyi tərəfindən vətəndaşlar arasında davamlı olaraq müxtəlif tibbi aksiyalar təşkil edilir. Bu tədbirlər zamanı müayinələr, həkim konsultasiyaları ilə yanaşı, sağlamlığın təşviqi istiqamətində maarifləndirici görüşlər keçirilir.
Növbəti belə tədbir Ağdərə rayonunun Talış kəndində baş tutub. Nazirliyin Elmi Tədqiqat Tibbi Bərpa İnstitutunun həkim heyəti tərəfindən əhali üçün səyyar müayinələr təşkil olunub.
Aksiya çərçivəsində Tibbi Bərpa İnstitutunun artroloq, nevroloq, fizioterapevt-reabilitoloq və tibb bacısından ibarət heyət əhaliyə tibbi baxış keçirib. Eyni zamanda, nevroloqlar tərəfindən EMQ (elektromioqrafiya) və EEQ (elektroensefaloqrafiya) müayinələri aparılıb. Müayinələr zamanı səhhətində problem aşkarlanan sakinlərə peşəkar tibbi məsləhətlər verilib və müvafiq müalicələr təyin olunub.
Orta yaşlı əhalidə onurğa, sinir, dayaq-hərəkət, həmçinin ümumi serebrovaskulyar xəstəliklərin aşkar edilməsi, 16-65 yaşlı əhali arasında skolioz və digər vertebrogen problemlərin diaqnostika və bərpası üzrə müayinələr aparılıb.
İnstitutun fizioterapevt və reabilitoloqları tərəfindən medikamentoz terapiya ilə yanaşı, həm təbii, həm də süni fiziki faktorları fərdi olaraq təyin etməklə, sağlamlığın erkən əldə olunmasına köməklik edən profilaktik tövsiyələr verilib.
Aksiya zamanı 70-dən artıq vətəndaş müayinələrdən keçib.

---

---