“Yüksəliş” sadəcə bir müsabiqə deyil. Bu, gələcəyə yatırılan sərmayədir. Hər bir ölkənin ən böyük sərvəti onun insan potensialıdır. İstedad, bilik və davamlı inkişaf istənilən uğurlu dövlətin əsas dayaqlarıdır. Hər bir güclü dövlət yalnız infrastruktur və resurslar üzərində deyil, hər şeydən əvvəl, bilik üzərində qurulur. İnsan kapitalına qoyulan sərmayə hər zaman ən yüksək nəticə verir.
Səhiyyə Nazirliyinin mətbuat xidmətindən bildirildiyinə görə, bu fikirləri səhiyyə naziri Teymur Musayev “Yüksəliş” müsabiqəsinin final mərhələsinin açılış mərasimində çıxış edərkən deyib.
Nazir qeyd edib ki, karyera inkişafı vəzifə yüksəlişi ilə yanaşı, ömür boyu öyrənmək, dəyişən dünyaya uyğunlaşmaq bacarığıdır: “İnnovasiyanın, rəqəmsal texnologiyaların, süni intellektin hər bir peşəni dəyişdiyi bugünkü dünyada davamlı öyrənmə qabiliyyəti ən dəyərli bacarıqlardan birinə çevrilir. “Yüksəliş” müsabiqəsi biliklərin sınandığı, fikir mübadiləsinin aparıldığı və gələcək rəhbər şəxslərin ortaya çıxdığı sağlam rəqabət mühiti yaradır. Müsabiqə hər bir iştirakçını öz potensialını reallaşdırmağa həvəsləndirir.
Bu gün burada iştirak edən finalçılarımıza səslənmək istərdim: Bu gün hər biriniz qalibsiniz! “Yüksəliş” müsabiqəsindəki iştirakınız artıq mükəmməlliyə olan sadiqliyinizi göstərir. Bugünkü nəticələrdən asılı olmayaraq, qarşılaşdığınız hər bir çətinlik və öyrəndiyiniz yeni təcrübələr peşəkar inkişaf səyahətinizə töhfə verəcək”, - deyə Teymur Musayev qeyd edib.

---

---