Azərbaycan Respublikasının Prezidenti İlham Əliyevin Sərəncamı ilə, ölkəmizin ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş Azərbaycan Respublikası Müdafiə Nazirliyinin hərbi qulluqçularından və mülki işçilərindən bir qrupu ölümündən sonra təltif edilib. Onların arasında tibb işçiləri də var.
Belə ki, tibb xidməti polkovnik-leytenantı Abdullayev Rasim Yaqub oğlu, tibb xidməti kapitanı Məmmədov Anar Kərəm oğlu, tibb xidməti baş leytenantı Fərəməzov Nurlan Əhliman oğlu və tibb xidməti leytenantı Ağayev Mirlətif Mirislam oğlu 3-cü dərəcəli “Vətənə xidmətə görə” ordeni ilə təltif ediliblər.
Prezident İlham Əliyevin digər Sərəncamına əsasən, Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiklərinə görə təltif edilmiş hərbi qulluqçular arasında da tibb işçisi var. Belə ki, tibb xidməti polkovniki Çobanov Roman Salman oğlu “Hərbi xidmətlərə görə” medalı ilə təltif olunub.

---

---